සිහින එසේ නොමැතිනම් සිහින සමාජයේ ඇතැමුන් මේ වචන දෙකටම එකම අර්ථයක් ලබා දෙයි. එහෙත් සත්‍යය වශයෙන්ම මේ වචන දෙකෙහිම ඇත්තේ එකම අරුතක් දැයි ඔබ කෙදිනක හෝ සිතාවත් බැලුවා ද? නින්දේ දී අප දකින සිහින රැය පහන්වන විට අවදිවනවාත් සමඟ බොහෝ විට අප මතකයෙන් දුරස් වුව ද ජීවතයේ අප දකින සිහින අපි මියැදෙන තුරුම අපේ ජීවිතවල කොටස්ව පවතියි. ඒ අතරින් සමහර සිහින යථාර්තයක් බවට පත්කර ගැනීමට නොහැකි වූ විට ජීවිතයෙන් පවා වන්දි ගෙවීමට ඇතැමුන් පෙළෙඹෙන්නේ මේ සිහින එතරම් අපි කාගෙත් ජීවිත සමඟ බැඳී පවතින නිසාවෙනි.
සිහින අපි කාගෙත් ජීවතවලට අඩුවැඩි වශයෙන් පවතින දෙයකි. ඇතැම් සිහින අප දෑස් වසා නරඔනමුත් තවත් සමහර සිහින අප දකින්නේ අප දෑස් වවර කර පියවි සිහියෙන් වේ. ඒ සිහින ඇතැම් විට අපව සමාජයේ උසස් අයෙකු බවට පත් කිරීමට ශක්තියක් වෙයි. කුඩා දරුවෙකු යන්තමන් අධ්‍යාපනය ලබා ඔහුට යමක් තේරෙන්නට අවබෝධ කරගන්නට පටන්ගත් දා සිටම එකී සිහිනයන් ඔස්සේ තම ජීවිතය හැඩගස්වා ගැනීමට පෙළඹෙයි. "මම ගුරුවරියක් වෙනවා," "මම දොස්තර කෙනෙක් වෙනවා" මේ වගේ සිහින පුංචි කාලයේ සිට සිතින් ධාරණය කරගනු ලබන ඔවුන්ගෙන් ඇතැමෙක් ඒ සිහිනයන් යථාර්යන් බවට පත්කර ගනිති.
ජීවිතයේ අධ්‍යාපනයට පමණක් නොව ආදරයට මෙන්ම ජීවත්මවීට ද අපට සිහිනයන් ඔස්සේ ගමන් කරන විට ඒවා අපේ ජීවිතවලට ළඟා කරගැනීමට වෙර දරන ඉලක්කයක් බවට පත්වේ. ඒ අතරින් ඇතැමුන් කුඩා කළ සිටම වාගේම සිහින සැබෑ කර ගැනීමට කය පමණක් නොව මොළය ද මෙහෙයවා ක්‍රියා කරන අයුරු දක්නට ලැබෙන්නා සේම විය යුත්තේ ද එයමය.
ඒ අතුරින් තවත් සමහරක් කුඩා කල සිට තමා දකින තමා ප්‍රිය කරන සිහින රාත්‍රී නින්දේ දකින සිහින මෙන් අතරමගදී බොඳ කරගනි. ජීවිතයේ කාලයත් සමඟ සිදුවන පරිවර්තනයන් හමුවව් අසන දකින දේවල් ඇසුරු කරන පිරිස් මෙන්ම යමෙකුගේ හිත තුළ ඇතිකරන නව හැඟීම් හේතුවෙන් ද ඇතැම් විට ඇතැමුන්ගේ සිහින සිහිනයන් ලෙසට යථාර්ථයක් කර ගැනීමට නොහැකිව බොඳව යන අවස්ථා වත්මන් සමාජයේ ඔනෑ තරම්. දැනට නුදුරු කාලයට ඉහත දී විශ්ව විද්‍යාල වරම ලද උපාධිධාරී තරුණියක විසින්ම තම සිය දිවි නසා ගැනීම එවැනි ඛේදනීය තත්වයකි.
මේ ජීවිතය නමැති දිගු ගමනේ දී අපි සියලු දෙනාම දකින්නේ එක සිහිනයක් පමණක් නොවේ. හොඳ අධ්‍යාපනයක් මෙන්ම වටිනා ආදරයක් සාර්ථක විවාහ දිවියක් මේ සියල්ල කාලයත් සමඟ විවිධ වයස් මට්ටම්වල දී අපේ ජිවිතවලට පවතින සිහිනයන් වුවත් ඒ අතරින් එකක් හෝ යථාර්ථයක් නොවූ විට ඇතැමුන් ජීවිතයෙන් පවා වන්දි ගෙවීමට සිදුවන්නේ මිනිසුන්ගේ ආධ්‍යාත්මය සමඟ සිහිනයන් මේ තරම් බැඳී පවතින නිසාවෙනි.
හීන මීට හාත්පසින්ම වෙනස් වූවකි. ඒ වචනය තුළ පවා ගැබ්ව පවතින්නේ හිස් බවකි. ඒ නිසාවෙන් අප හඹා යායුත්තේ අපගේ සිහින මිස ඒවා හීන කර ගැනීම නොවේ. ඒ අනුව හීන යනු අපට සැබෑ කරගත නොහැකි වන බලාපොරොත්තු ඉලක්ක ලෙස දැක්වමෙහි වරදක් නැත.
ඒ නිසාවෙන් ඔනෑම මනුෂ්‍යයෙකු වෙහෙසිය යුත්තේ තමාගේ සිහින යථාර්ථයක් කර ගැනීමට විනා ඒවා හීන කර ගැනීමට නොවේ. සිහින සැබෑ කර ගැනීමේ දී සිදුවන අභියෝගතා බාධක හමුවේ ඒවාට මුහුණ දීමට හැකියාවක් මෙන්ම ඒවා සැබෑ කරගැනීමට නොහැකිවන තැන සම සිතින් ඒවා විඳ දරාගැනීමටත් ශක්තියක් තිබිය යුතුය.
ඒ නිසාවෙන් එකී තත්වයන්ට ප්‍රඥාවෙන් මුහුණදෙමින් ජීවිතය සාර්ථක කර ගැනීමට සිහිනයන් හා බැඳී ඒවා සැබෑ කර ගැනීමට අප නිවැරදි මාර්ගයන් ඔස්සේ ක්‍රියා කළ යුතු වූවා සේම අපි සිහින දැකිය යුත්තේ ඒවා සැබෑ කර ගැනීමට මිස ඒවා හීන කර ගැනීමට නොවන බව අප පසක් කර ගත යුතුය.
