විදෙස් රැකියා හා ශ්‍රී ලාංකීය කාන්තාව

                      
                           

          මෙම ලිපිය ලිවීමට මා පෙළඹවූයේ මෑතකදී මා නැරඹූ රූපවාහිනී වැඩටහනකි. මෙය ශ්‍රී ලාංකිකයන්ට අලුත් මාතෘකාවක් නොවූව ද එදාට සේම අදටත් විසඳී නොමැති ගැටලුවකි. 

          සාම්ප්‍රදායික ශ්‍රී ලාංකික සමාජ සංස්කෘතිය තුළ කාන්තාව ගේ මුල්ලට ව හැදී වැඩුණත් දියුණුවන ලෝකයේ ජීවන අරගලය ජයගැනීමට කාන්තාවට ද විශාල සටහනක් කිරීමට සිදුව තිබේ. විදෙස් රැකියා යන මාතෘකාව කතිකාවට බඳුන් කිරිමට ආරම්භයේ සිටම පිරිමි පාර්ශවයට වඩා ඒ හා බැඳෙන්නේ කාන්තාව වීම සුවිශේෂත්වයකි. නමුත් ගැටලුව වන්නේ රැකියා සඳහා විදේශගතවන කාන්තාවන්ට තම රැකියාවම පමණක් සිදු කර ජීවත් වීමට ඇති අයිතිය එම රටවල සුරැකෙනවාද යන්නයි.

          උතුම් මව් පදවියට උරුමකම කියන ගැහැණිය   මවක් වූ විට තම දරුවන් පෝෂණය කරමින් තම ජීවිතය සාර්ථක කර ගැනීමට දහසකුත් බලාපොරොත්තු පොදි බැඳ ගනිමින් විදෙස් ගතවන්නේ තම ආත්මය විකුණමින් විදේශියන්ගේ කාමාෂා සන්සිඳවීමට නොව, තම දරුවන්ට පවුලට හොඳ හෙට දිනක් උදාකර දීමටය. නමුත් අවසානයේ ඇයට නැවත තම මව රටට පැමණිමටවත් ඉඩක් නොලැබෙන තරමට ඔවුන්ගේ ඉරණම වෙනස්වන්නේ කුමන හේතුවක් නිසාදැයි අප සොයා බැලිය යුතුය.

           අප දැන හෝ නොදැන මෙවන් අවාසනාවන්ත ඉරණමකට ශ්‍රී ලාංකික කාන්තාවන් කොපමණ ප්‍රමාණයක් ගොදුරු ව ඇති ද? නමුත් තවමත් එය අවධානයට ලක් නොවූ කරුණකි. මෑතකදී මා නැරඹූ රූපවාහිනී වැඩසටහක විවරණය වූයේ එවන් වූ ඛේදනීය කතා පුවතකි.

          පවුලේ තිබූ ආර්ථික දුෂ්කරතාව මැඩගැනීමේ අරමුණින් විදේශගතවූ එක්තරා කාන්තාවකට තමා රැකියාවෙහි නිරත වූ නිවෙසේ ස්වාමියාගේ ගොදුරක් බවට පත්වන්නට විය. බලාපොරොත්තු පොදි බැඳගනිමින් විදෙස්ගත වූ  ඇයට අවසන උරුම වූයේ ඛේදනීය තත්වයකි. අද වනවිට තම පවූලේ පිළිසරණක් පවා නොමැතිව දරුවන් රැක බලා ගැනීමට ඇයට සිදුව ඇත්තේ සිගමන් යැදීමටය. හිසට සෙවණක් හිතට නිවනක් සොයා විදේශගත වූ ඇයට නැවත තම මව් රටට පැමණීමට සිදුවූයේ ඒ සියලු බලාරොත්තු අහිමි කර ගනිමිනි.

          මෙය ඒවන් වූ තවත් එක් සිදුවීමක් පමණි ඒත් තවත් මෙවැනි සිදුවීම් කොපමණ සිදුවනවා ද? ඒ නිසා අප වරක් නොව දෙවරක් මේ පිළිබඳ සිතා බැලිය යුතුය.මෙවැනි සිදුවීම් නිසා ශ්‍රී ලාංකික කාන්තාව සුරක්ෂිත කිරීමට කුමන හෝ පියවරක් ගත යුතුමය. රජය මඟින් හෝ වැඩපිළිවෙළක් සැලසුම් කර අප රටෙන් විදේශ ගතවන කාන්තාවගේ ආරක්ෂාව සුරක්ෂිත කළ යුතුය. නොඑසේ නම් ස්වයං රැකියා ආදිය හඳුන්වා දෙමින් ඇයට දිරියක් විය යුතුය.

        නැතිනම් දරුවන්ට මව්වරුන්, ස්වාමියන්ට බිරින්ඳෑවරුන්, ආදරණීය මවුවරුන්ට තම දියණිවරුන් ද අහිමි ව යනවා පමණක් නොව ශ්‍රී ලාංකික සමාජයේ කාන්තාව යන උදාර චරිතය තවකෙකුගේ ආශාවක් සංසිඳුවා ගැනීමට අලෙවිවන සිල්ලර භාණ්ඩයක් බවට පත්වනවා නිසැකය.