වටිනාකම් නොවටිනාකම් මැදින් ජීවිතය.

    

                                                                                                          

                            




            ජීවිතය යනු විවිධ විපර්යාස හමුවේ නොසැලී ඉදිරියට යා යුතු දිගු ගමනකි. ඇතැම් විට මේ ජීවිතය උපමා කළ හැකි අපූර්ව සංසිද්ධියකි වැස්ස. අහසේ සිට පොළවට වැටෙන වැහි බිඳු අතුරින් ඇතැම්  වැහි බිඳු  කෘෂිකර්මාන්තය සශ්‍රීක කරමින් මේ රටේ පමණක් නොව බොහෝ  පිරිසකගේ ජීවිතය පවා සාර්ථක කරගැනීමෙහි ලා  විශාල මෙහෙයක් ඉටු කරන නමුදු ඇතැම් වැහි බිදු වැටෙන්නේ කොතැනටදැයි ගලා යන්නේ කොතැනටදැයි නිශ්චිත අවබෝධයක් නොමැතිවාක් මෙන් ඔහේ ගලාගෙන යන්නේ තමාගෙන් කිසිවෙකුට පල ප්‍රයෝජනයක් ලබා නොදෙමිනි. ජීවිතය ද මෙවැනිම වූ දෙයකි.

           ඕනෑම පුද්ගලයෙකු මනුෂ්‍යයෙකු ලෙස මෙලොව උපත ලද දා පටන් ම විවිධ ආකාරයේ වටිනාකම් තමා වටා එක් රොක් කර ගනිමින් නිරන්තරයෙන් වෙහෙසෙන්නේ තම ජීවිතය වටිනා එකක් බවට පත් කර ගැනීමට වුව ද වර්තමානයේ ජීවත්ව

.

න ඇතැම් පිරිස් වටිනාකම්වලින් කෙතරම් අනූන වුව ද ඒවායෙන් තම රටට පමණක් නොව තමාට ද ප්‍රයෝජන ලැබීමටත් පෙර ඔවුන්ගේම ජීවිතය හැර යන අවස්ථා ඕනෑ තරම්.

            අධ්‍යාපනයෙන්, ගුණධර්ම අතින් කෙතරම් වටිනාකම් අපේ ජීවිතය සතුව පැවතිය ද අප එවැනි වටිනාකම් අපේ ජීවිතවලට එක්කර ගත්ත ද ඒවායෙන් ප්‍රයෝජන නොලබා පොදි ගසා තබා ගැනීමෙන් තමාටත් තමා ජීවත්වන රටටත් කිසිදු ඵල ප්‍රයෝජනයක් නොවනු ඇත.

            මෑතකාලීනව ශ්‍රී ලාංකේය  තාරුණ්‍යය තුළ පමණක් නොව ඕනෑම රටක සංවර්ධනයේ පැවැත්ම කෙරෙහි සුවිශේෂීම පිරිසක්වන තරුණ පරපුර තමාගේ වටිනාකම් තුළින් පල ප්‍රයෝජන ලැබීමටත් පෙර තම ජීවිතය අතහැර නැවත නොඑන්නටම යන අවස්ථා ඕනෑ තරම් වේ. අධ්‍යාපනයේ ඉතා අසීරු කඩඉම් පවා ජයගෙන විශ්වවිද්‍යාල වරම් ලද බුද්ධිමත් යැයි පිළිගන්නා තාරුණ්‍යය තුළ ද සිය දිවි නසා ගැනීම් වර්තමානයේ සුලභ කරුණකි.

            ප්‍රේම සබඳතා නිසාවෙන් හෝ වෙනත් කුමන හේතු සාධකයක් නිසාවෙන් හෝ ඔවුන් මෙපමණ කලක් තම  ජීවිතයට එක්කරගත් වටිනාකම් අගයන් තුළින් තමාගේ රටට තමා හැදූ වැඩූ  මවුපියන්ටවත් යුතුකම් ඉටු කිරීමට පෙර මෙවැනි තීරණවලට එළඹීම ඉතාමත් කනගාටු දායක තත්වයකි.

            එහෙත් මෙවන් පිරිස් අතුරින්  තවත් පිරිස් හිසට වහලක් හිතට නිවනක් නොමැතිව වුව ද තමාට ලද ජීවිතය කෙසේ හෝ ගැට ගසා ගන්නට උත්සහ දරති. ඔවුන්ගේ ජීවිතයට කිසිදු වටිනාකමක් එක් කර ගැනීමට නොහැකි වුව ද තමා ලද මිනිසත් බවේ වටිනාකම රැකගෙන ජීවිතය ජයගැනීමට ඔවුහු වෙර දරති අධ්‍යාපනයෙන් ධනයෙන් සශ්‍රික නොවුව ද ආත්ම ශක්තිය, අභියෝග ජයගැනීම වැනි වටිනාකම් ඔවුන් උපදින විටම තම දෑතේ මිට මොලවාගෙන පැමිණියා වැනිය.

           ඕනෑම සමාජ ක්‍රමයක මෙකී දෙපිරිසම ජීවත් වෙයි. එනම් වටිනාකම් තිබුණ ද එහි ඵල ප්‍රයෝජන නොවිඳින පිරිස් හා වටිනාකම් නොමැති වුව ද කෙසේ හෝ තම ජීවිතය රැක ගැනීමට උත්සහ දරන පිරිස් ලෙස ඕනෑම සමාජයක මානව කණ්ඩායම් දෙපිරිසක් ජීවත් වෙයි.

           ඕනෑම පුද්ගලයෙකු තම ජීවිතයට වටිනාකම් එකතු කර ගනු ලබන්නේ ඒවා පොදි ගසාගෙන මිය යාමට නොව එයින් තම රටට ජාතියට යුතුකම් හා වගකීම් ඉටු කිරීමටය. ඒ නිසාවෙන් වඩා වැදගත්වන්නේ වටිනාකම් එක්කර ගැනීම පමණක් නොව එයින් තමාට මෙන්ම තම රටට තමා හැදූ වැඩූ මවුපියන්ට ද යහපතක් සැලසීමටය.

          අධ්‍යාපනයෙන් ධනධාන්‍යයෙන් කොතරම් සශ්‍රීක වුව ද යමෙකුට මේ ජීවිත ගමනෙහි එන අනේකවිධ බාධක හමුවේ නොසැලී මුහුණ දීමට ආත්ම ශක්තියක් නොමැත්තේනම් එවැනි අයෙකු වටා කොතරම් වටිනාකම් එක් රැස් වී තිබුණ ද පලක් නොවේ. ඒ නිසාවෙන් මිහිපිට ජීවත්වන  අප සෑම විටම උත්සහ දැරිය යුත්තේ වටිනාකම් එකතු කර ගන්නවා සේම ඒවා තුළින් අපට මෙන්ම අප ජීවත්වන රටට සමාජයට අප හැදූ වැඩූ මවුපියන්ට එයින් පල ප්‍රයෝජන ලබා දීමටය.

          වටිනාකම් නොවටිනාකම් මැදින් අප මේ ගෙවන ජීවිතය අපට සාර්ථක කරගත  හැකිවන්නේ අප ඒ ආකාරයෙන් කායිකව  මෙන්ම මානසිකව ද සංවර්ධනය වුව හොත් පමණි.